قصة قصيرة | يوميات الحرب.. (طق حنك) في الحديقة العامة

بشار حبال:

توقفت فتاة محجبة عشرينية العمر أمامي بحديقة المدينة، نظرت إلي قليلاً ثم جلست إلى جانبي على المقعد مع ترك مسافة بيني وبينها، لم أكترث لها رغم استغرابي لأن العديد من المقاعد شاغرة حولي.

أما لماذا اختارتني فتلك قصتنا:

قالت بعد أن مسحت عرق وجهها بطرف حجابها وكأنها تحدث نفسها. الحياة قحبة بنت قحبة!

انتفضت مرتبكاً من جملتها المباشرة وكأنها تحرش صريح وواضح، ونظرت إليها ملياً كي أدرك نواياها، لم تكترث لنظرتي وكأنني غير موجود، ثم تابعت: من طيز صباح ربنا وأنا عم لف ودور على كعابي أشحذ كم ليرة لكي أستر حالي وحال بنتي، والناس قلبها أسي،  بيطلّعوا علينا بقرف وكأن مصيبة وقعت فوق رأسهم، مانهم عرفانين أنو المصيبة جايتهم، ما بدك تعطي شي بلا، بدك تعطيني كتر خيرك بس ليش هالأسى عند الناس، فوق الموت كمان عصة قبر، صحيح صار في شحاذين كتير وفي منا كتيرغلاظ، بس شو منساوي لناكل، بتعرف ياحجي (وهنا نظرت إلي بشكل مباشر وواضح)، لو واحد قال لي أروح معه على البيت وبعطيك خسكار النهار كلو، والله واسم الله لكنت رحت معه، الله بيسامح أكيد، لكن دوارة بالشوارع على كم ليرة باليوم يادوب يكفو أكل؟ والله طقوا رجليي وفوقها ذل وشرشحة ومنيّة، الرجال الخرا، قصدي زوجي ابن الخرا ترك كلشي وعملي فيها ثائر، آل شو؟ بدو يسقط النظام، يسقط جنابه أول، بتعرف ليلة العرس ما عرف يتجوز من كتر مانو دب، أنا دبّرتو، كنا عايشين، عنا أرض وهو موظف وعين الله علينا، صحيح ما كنا أكابر بس كنا عايشين وما منحسد الملك، زرعات الأرض لحالهم كانوا يطعمونا كل السنة وراتب الوظيفة صحيح قليل بس كان ساترنا من المرض واللبس، بس حمار ابن حمار ومانو عرفان كوعو من بوعو،  شو بدك تحكي لتحكي، قلتلو يارجّال قبل ما تروح وتتركنا للهفا يلي مالو خير لأهلوا مالو خير لحدا، انعجأ عليّ وقال: الله اكبر عليك يامرا، الضيعة والشباب كلها عم تجاهد في سبيل نصرة الحق وأنا لوحدي ضل جبان قاعد على خصر مرتي، شو ما عاد فيه رجال وشرف. ابن الحرام اذا قعد واحد غيرو على خصري أحسن، آل رجال آل،  الله لا يفرجيني فيك يوم منيح ياحسن ابن مهدية، إنشاء الله بتموت موت الكلاب لأنو أنا كل يوم بموت ميت موتة، سيدي فشيت قهري سامحني حجي والله قلبي كان طاقق. شفت الله شو كريم بعتك بطريقي لفش قلبي قبل ماطق.

_قلت خير يا أختي الله يفرجها عليك وعلى الجميع،  شو اسمك أختي.

_ بدرية، ومن بدرية ربنا عم حوص بالدنيا كل يوم، وأنا لا تفتكرني جاهلة درست لصف البكلوريا كمان وكان مناي كمل تعليمي، بس أبي الله يسامحو هيك بدو، أل شو اجانا النصيب ولازم ننضب بالبيت منشان السترة، والله انسترتي كتير يا بدرية وما ناقصنا غير نبوس طياز العالم وعم نبوس، رضينا بالهم والهم ما رضي فينا.

_ بدريه بتروحي معي على البيت؟ نظرت إلي بعيون مفتوحة وضحكت حتى مال رأسها إلى الخلف، نظر إلينا شيخ عابر وقال وهو يتجاوزنا: أستغفر الله العظيم!

_ ليك حجي أنت وجهك ما وجه واحد روح معه على البيت، بعدين مبين عليك ختيار وعضمك فاضي، لا تواخذني على صراحتي أنا بدي شب مطقق أعطيه ويعطيني، مليت نظرات الشفقة، كلشي بحقو، خود حق وهات حق وما حدا يكون الو منية معي،  الله بيسامح، أيه ولازم يسامح لأنو جبلي هيك نصيب، الله بيبلي والله بيعين.

قلت ضاحكاً أنت فهمتيني غلط يا بدريه أنا ما بدي منك شي أبدا، وأنا عضمي فاضي متل ما قلتي وعم أشتغل على الفضال كمان، بس بتروحي معي وبتساعدي مرتي بعمل البيت ومنعطيك يلي الله بيسرو، وخاطرك محفوظ وكرامتك من كرامتنا.

_ ما عجبتني شغلتك بيجوز مرتك تطلع غيورة ويصير شي ما بيحبو ربنا، شو إلي بوجع هالراس، وخراب البيوت العامرة، حاجة انخرب بيتنا من ورا ابن الحرام صرلي تلت سنين ما شفت وجهه وبالناقص، سيدي بخاطرك حجينا، طقينا شوية حنك وفضفضنا عن قلبنا. وقبل أن تذهب قلت لها خدي بدريه ومددت يدي ببعض النقود، وكل يوم مري بالحديقة أنا دائما اجلس هنا ومنشوف شو بيسر الله . قالت لا والله ما باخد شي منك وجهك الحلو وقلبك النظيف عن مال الكون،  بخاطرك دعيلي.

2

أسندت ظهري للمقعد أفكر ببدريه وحالتها وحال البلد بقلب مليء بالأسى والقهر، وقبل أن أصحو من صفعة بدرية، وقف الشيخ الذي استغفر ربه حين مر بنا وكأنه كان يراقبنا وقال: السلام عليكم! وجلس مكان بدرية.

وعليكم السلام

كيفك أخي ودون مقدمات قال: هدول النسوان والعياذ بالله منهم شيطان رجيم مخبى بشكل إنسان، الوحدة منهم تعمل حالها فقيرة ومنتوفة مشان تستعطفك وتاخد شي كم ورقة وما عندا مانع ترتكب المعصية والعياذ بالله، أساساً مجرد انو تحكي مع واحد غريب بينهز عرش الرحمان، أنا شفتك وشفتا كيف عم تضحك وتتمايل هذه العاهرة لتطري قلبك وشي تاني، بيوم الدينونة رح تضحك  بنار جهنم، الله يمهل ولا يهمل، أنت مبين عليك رجل صالح بتخاف ربنا لا تخلي هيك شكيلات يضحكوا عليك، طق الحنك حرام وما اختلى رجل وامرأة إلا كان الشيطان بينهما، صحيح انتو قاعدين بحديقة عامة أمام الناس، بس هي خلوة كمان لأنو الشيطان أكيد لعب بعقلك، استغفر الله يا أخي ولا تسمح للنسوان والشيطان يدخلوا لقلبك، وبلا مؤاخذه ما كلشي حكيتو أنا صحيح؟ شو كنتوا عم تحكوا؟

قلت له:

كنا عم نطق حنك.

15\5\2015