بلا عنوان

رمضان إبراهيم:

قالت لمين بتكتب الأشعار

وبتلحن الكلمات وغناني

وبتسكّر الأقداح والخمار

تَ كلّ كاس يحن عالتاني

اتطلعت فيها وفي بقلبي نار

من دهر ما في يوم هنّاني

وكبست عا جرحي جمار النار

وغطيت دمعة حزن بجفاني

ترددت احكي واشرح الأسرار

وكانت بهيكي قصص طمعاني

تاتشوف مين الشاغلي الأفكار

اللي الروح فيها كتير هيماني

قلتلها الشاعر ما فيه نهار

بيكتب لوحدة عليه تقلاني

إن ما عملتو عالخصر زنار

أو شال وقت تكون برداني

تورّدوا خدودا قلت شو اللي صار

من شوي كانت هيك زعلاني

وهجمت عليي كنّها إعصار

وقالت عَ كتفي ضلّ متل الشال

من البرد عم بتكتك سناني