بلا عنوان (13)
رمضان إبراهيم:
بتذكّرك مع كل نبضة شوق
بيدقّها قلبي على غيابك
وتا أسمعك .. ويلي شو عندي توق
قمحات شعري بتعشق ترابك
تمنيت لو أعمل عيوني طوق
تطوق بلهفة صفحة كتابك
تاشيل من حرفك رحيق الذوق
وأخطف ألق مزروع بهدابك
يا محلقة بالحلا لفوق .. لفوق
والكل بدو اليوم إعجابك
لا تزعلي .. ولا تحلفيني روق
صار لي دهر ناطر على بابك
***
لما المسا بيجمّع الأطيار
وبيغمّض جفون الزهر بكير
بيطلّ وجهك شمس ليل نهار
والكون كليتو ضيا بيصير
والصبح لما بيفتح الأسرار
بتوعى غيوم تطيّر شحارير
هيك الدني مرسومة الأقدار
يارب شو مخبّي لنا تقادير
يالله ارجعيلي مكلّلة بالغار
بدموع عيني بخطلك تحرير
حاجي بقا تتخلقي الأعذار
لا تكتبي بدموعك التبرير
رح حلفك بالفل بالجلنار
بالكرم بالعنقود بالتخمير
ظلي احفظي الذكرى مع التذكار
وعرخام جسمي كتّري مشاوير